Affianca u ricordu di Bonaparte i chjassi d’Aiacciu induv’ellu passò a so zitellina, è dinù quelli di Bucugnà induv’ellu fessi un’arretta vultendu da l’Egitta da truvà ci rifugiu nanzu di piglià a strada di l’esiliu in u 1793 ; mentre chì in Bastelica è in Eccica a Suaredda stà sempre l’ombria di Sampieru Corsu, chì a storia averebbe inspiratu à Shakespeare u persunagiu d’Othello.

Inde stu rughjone cù un passatu storicu riccu, da a calella d’Aiacciu à a Bocca di Vizzavona, passendu per e valle di a Gravona è di u Prunelli, liate da unepochi di vechji chjassi, si sà scumette dapoi un pezzu nant’à a cumplementarità è a sulidarità. Ùn hè mancu à pena un inciampu a dualità trà mare è monti, chì incita à scambià, à fà i barratti, u cummerciu è, à l’epica più recente, à adunisce è travaglià inseme per salvà è trasmette i sapè fà. Tandu, ùn ci hè da stunà si ch’elli si spartinu e pruduzzione i paesi trà a muntagna è a piaghja : castaneicultura, allevu purcinu in altitudine, allevu pecurinu, caprunu è buinu, ma dinù a viticultura è e culture urtulane in piaghja.

Hè dinù u rughjone una bella terra d’accolta per l’”Apa nera”, a piccula apa nera à l’ecotipu specificu di a Corsica, ma dinù per parechje piante arumatiche è medicinale è per l’arburi fruttaghjoli. Si sò dinù creati partinariati per priservà u riccu patrimoniu naturale ch’elli custituiscenu i fruttiferi anziani da sviluppà l’arbureti cù l’odori è i savori di tandu. S’arritovanu sti savori inde u “Bastelicaccia”, u famosu furmagliu di pasta frolla è di crusta affiurata chì disceta e papille cun deliziu !