Labellu ustaria

U Cuncettu

U labellu « Gusti di Corsica » sarà attribuitu à l’ustarii isulani chì si signalani  pà a qualità di i prudutti corsi utilizati ind’è l’elaburazioni di i so pristazioni.
À puntu, issu labellu avarà da guarantiscia chì l’ustariaghji utilizeghjani   prudutti d’urighjini corsa è di qualità ricunnisciuta.
Issu labellu divintarà u spechju d’una gastrunumia corsa chì valurizeghja i risorsi di i tarritorii.

L’ Ughjittivi

• Crià una rifarenza sicura pà i cunsumatori è i turisti à a ricerca di i prudutti righjunali di qualità.
• Valurizà i prudutti isulani è i sapè fà di l’ustariaghji corsi
• Offra guaranzii di qualità chì vinarani à puntiddà i dimarchji qualità di i pruduttori isulani.
• Rinfurzà a maghjina gastrunomica di a Corsica.
• Valurizà i parcorsi corti uffrendu sbocchi novi pà i pruduttori lucali
• Metta u risaltu à nantu à l’ustariaghji chì valurizeghjani i prudutti lucali di qualità
• Cunfirmà i sapè fà di i cucinari isulani è di i nostri pruduttori com’è un elementu culturali in termini di patrimoniu culinariu corsu, sottu à u so aspettu tradiziunali è nuvatori.
• Rializà una reta tarrituriali di l’ustarii labillizati
• Crià una dinamica di cullaburazioni trà i prufissiunali agriculi è a  risturazioni.

A cartula « Gusti di Corsica »

Una cartula avarà com’è scopu di pricisà u quatru d’acquistera di u labellu « Gusti di Corsica»
Pà ogni ustariaghju chì vò adiriscia, li tuccarà à cunfurmà si à stu labellu.

Sarani privisti :

Ingaghjamenti di pettu à i pristazioni :

• Solu i prudutti cirtificati pudarani essa pruposti nantu à a carta, à u ripastu è utilizati ind’i ricetti (AOP farina di castagna di Corsica, Lonzu, Coppa di Corsica, Prisuttu, meli di Corsica, brocciu è IGP clementini di Corsica, nuciglia di Cervioni, Pumelu di Corsica).
• Solu l’AOP « oliu d’aliva di Corsica » hè prisenti nantu à i toli (tavule).
• Quandu i piatti sò cucinati cù l’AOC oliu d’aliva di Corsica, sarà pricisatu à nantu à a carta
• I dinuminazioni pricisi di i prudutti sò scritti nantu à i listini (Es : « AOP Miel de Corse » o « AOC prisuttu », ecc.) ancu s’eddu si tratta d’ingridienti ind’una ricetta (Es : pastizzu cù a farina di castagna corsa AOP »).
• I prudutti carnaghji (viteddu, agneddu lattaricciu è caprettu) sarani par obligu isciuti d’addevi corsi
• A staghjunalità di i prudutti freschi è di i salaturi avarà da essa rispittata, in particulari pà a robba purcina, i frutti è i ligumi.
• I frutti è ligumi d’urighjini corsa sarani prifiriti (in particulari  i pumati, l’insalati, i miloni, i patecchi, i parsichi è i brugnò)
• I piattoni di casgiu avarani da essa cumposti cù trè tippi di furmagli pasturecci corsi à u minimu.
• A carta di i vini devi prupona una scelta larga di vini righjunali, in particulari di l’AOC di a righjoni duva hè situatu u stabilimentu.
• A prisentazioni di i piatti devi essa accunciata bè.
• I piatti sò elaburati ind’ì u stabilimentu.

Ingaghjamenti di pettu à a dimarchja

• Essa un imbasciatori di i pruduttori lucali
• valurizà i pruduzzioni agriculi corsi
• participà à l’uparazioni di cumunicazioni è di prumuzioni di u  patrimoniu gustativu di a Corsica
• prumova i Stradi di i Sensi Sputichi (Routes des Sens Authentiques)
• cumunicà nantu à u labellu « Gusti di Corsica»
• una ducumentazioni chì prisenta i dimarchji qualità è a Strada di i Sensi hè dispunibuli à nantu à un supportu chì si vedi.
• Essa capaci di spiigà l’urighjini di i prudutti à i clienti.
• Ghjucà u rollu di priscrittori di a Strada di i Sensi di u so tarritoriu (rinsignà è cunsiglià i clienti)

U Cuntrollu Qualità

Sarani fatti virificazioni è cuntrolli ‘qualità’ interni è sterni ind’i stabilimenti labillizati.
Issi cuntrolli ani com’è scopu di :

• Virificà u rispettu di l’ingaghjamenti di a cartula « Gusti di Corsica»
• Assicurà a cridibilità di a dimarchja
• Rinfurzà a prufissiunalisazioni di u stabilimentu
• Migliurà a lisibilità di a qualità di l’ufferta
• Valurizà i prufissiunali indiati ind’a qualità

U cuntrollu internu

Pà ogni stabilimentu, hè rializata un quatru d’evaluazioni chì ripiglia i punti d’ingaghjamentu di a cartula qualità. St’arnesi devi parmetta à ogni aderenti di cuntrullà si da par sè di pettu à l’ubligazioni di a cartula.
A rializazioni di issu autucuntrollu è di u rispettu di a cartula sarà virificata da i sirvizii di l’ODARC cù visiti à l’impruvisu.
Issu cuntrollu internu valuteghja a capacità di u stabilimentu riguardu à a cartula di qualità è, s’edda casca, aiuta l’aderenti à circà suluzioni pà rispittà megliu u quaternu di carichi è migliurà a qualità di l’accolta. Issu cuntrollu parmetti di fà un bilanciu parsunalizatu è ancu racumandazioni s’eddu ci voli.
À tempu, l’ODARC pò intarvena cù u scopu di cunsiglià è accumpagnà u stabilimentu ind’a rializazioni d’accumudamenti.

U cuntrollu sternu

Tutti l’aderenti sò cuntrullati di modu rigulari, à sapè una volta à u minimu tutti i trè anni.
Issi cuntrolli sò rializati da un cabinettu di cuntrollu sternu à parta d’una griglia di criterii chì ripiglia l’elementi di a cartula « Gusti di Corsica ». Un débriefing hè rializatu à a fini di u cuntrollu cù l’aderenti è un rapportu di cuntrollu hè inviatu à u stabilimentu è à l’ODARC.
In casu di mancamentu impurtanti à u quaternu di carichi, l’aderenti si vedi nutificà un avertimentu. Tandu i sirvizii di l’ODARC visiteghjani u stabilimentu pà pruvà à rigulà u prublema incù l’aderenti.
Un sicondu cuntrollu hè rializatu dopu da u cuntrullori indipindenti. S’eddu parsisti u mancamentu, tandu u stabilimentu hè sclusu da a reta « Gusti di Corsica ».