Centru di Corsica
Da a furesta folta di Vizzavona sin’à a statula di u Cristu Rè chì supraneghja a Bocca à Verghju, i passiunati di natura si camparani. Ci si pò fà bagni, ci si faci spassighjati sereni ind’i furesti di pinu Lariciu, parcorsi nantu à i branchi di l’arburi, cavallu, spassighjati ind’i tragoni (canyoning), omu pò attippà ver di i cimi di i muntagni Cintu è Rutondu, omu si pò mirà ind’ì l’acqui chjari di i lavi di u Tavignanu è di a Restonica … Ma u Centru di Corsica, u cori storicu è giugraficu di l’isula, hè dinò un’invitazioni à scopra l’anima corsa, i so sonnii di libertà purtati da u grandi Pasquale Paoli. U visitatori pudarà amparà a so storia ind’i stretti di Corti o quand’eddu faci a visita passiunanti di u Museu di a Corsica.
Da u Niolu, « tarra di pastori », chjusa ind’un stucciu minerali, sinu à a vaddi campagnola di Tavignanu, aparta nantu à a piaghja d’Aleria, addivatori, pruduttori di castagni, urtulani, apicultori… si ritrovani in ghjiru à una vulintà d’uniscia sapè fà tradiziunali è qualità. Issa qualità và di paru cù a dulcezza di l’accolta parsunalizata chì vi sarà risirvata ind’i campeghji agriculi, l’alloghji campagnoli, i stanzi è toli d’ospiti.
Da veda... Da fà
A furesta di Vizzavona, a vaddi di u Verghellu, a vaddi di a Restonica, u Monte Cintu, u Monte Rutondu, u Capu Tafunatu, a Paglia Orba, u lavu di Ninu cù i so pozzine carattaristichi è i so cavalli in libertà, i lavi di Melu, Capitellu, Goria, Galeria, Oriente..., i fiumi (Ascu, Tavignanu, Restonica, Golu), u chjassu archiulogicu d'Albertacce, a ‘cascade des Anglais’, a cappedda Sant' Eliseu, l'Arca di Corti, a Scala di Santa Regina, u ponti d’Altiani (XVIu s.), a Citadella di Corti è u Museu d'Antrupulugia di a Corsica...
Da ùn mancà
- I marcati di i pruduttori.
- A Fiera de l'Artighjanatu è di a Gastrunumia Corsa, u 6 d’aprili in Corti.
- A Fiera di u Casgiu, i 3 è 4 di maghju in Venacu.
- A Fiera di Francardu « Arti è tradizioni corsi », i 31 di maghju è 1u di ghjugnu in Francardu.
- Fiera di u Legnu è di a Furesta, i 9 è 10 d’aostu in Vezzani.
- A Santa di Niolu (festa rilighjosa è fiera agricula « Muntagna è sviluppu »), i 6, 7 è 8 di sittembri in Casamacciuli.
