U casgiu corsu
Un carattaru particulari
A Corsica, chjamata tempi fà « isula di pastori », ferma l’ereda d’una forti tradizioni d’addevu di pecuri è capri di razza corsa à vucazioni lattaghja. Issa lascita si spiega da u carattaru assai muntagnosu di l’isula : l’addevu d’un picculu bistiami hè una di i più beddi maneri di valurizà u rughjonu.
A pascura essendu a basa di a magnusca di i greghji isulani, a ricchezza di a flora, a diversità di i tarritorii è di a vegetazioni rinfurzati da a pratica di a muntagnera dani à u latti corsu qualità urganulettichi spicifichi.
Sti pratichi d’addevu assuciati à razzi di u locu è à un sapè fà anticu dani à i furmagli corsi una sputichezza unica ind’è tuttu u Mediterraniu.
I furmagli pasturecci tradiziunali sò fatti sicondu tecnichi vicini. Si tratta di casgi à duminanti cù u caghju, cù a pasta modda è a crustula lavata o fiurita. Sicondu i tarritorii isulani, ci sarà u « Niolu », u « Casgiu Vechju di Calinzana », u « Bastelicaccia » o u « Venachese ». Fora di u « Casgiu Sartinesu », chì hè uttinutu à parta d’una pasta sprimuta è micca cotta.
I furmagli fatti cù u latti caprunu sò più forti à u gustu, mentri chì quissi fatti à parta da u latti di pecura sò più dolci.
Missi di modu tradiziunali ind’i « formi », po manighjati un bellu tempu pà u staghjunamentu, sviluppani parfumi di latti frescu è di nucigliula quand’eddi sò cunsumati à u principiu. À u filu di u staghjunamentu, facini senta adori di spezii dolci, di cunfittu è di caccaò, chì li dà a so riputazioni di casgi cù un carattaru assai forti. D’altrondi, certi sò cunsumati à usu cù a cunfittura di fichi pà adulciscia u so gustu putenti.
Pà pruteghja issu patrimoniu culturali è gastrunomicu di l’isula, sò missi in baddu dimarchji AOC pà i sfarenti variità di furmagli corsi.
