In ghjiru à l’alivu è u castagnu
L’arbureti di castagni è d’alivi cuntribuiscini à u patrimoniu paisaghjeru di a Corsica.
Sò posti nantu à tarreni assai varii, cù niveddi di teppa sfarenti, accissibili o micca, qualchì volta assai luntanu da i paesi è da i reti stradali.
U castagnu
Ogni vaddi hè un rughjonu d’una ricchezza gustativa eccezziunali. Si conta à pocu pressu menu di 50 variità di castagni duva si pò truvà à puntu : a campanese, a gentile, a niella è a tighjulana apprizzati assai pà a farina, a rossa è l’insitina pà a cunfisaria (castagni cunfitti) è a carpinaghja, com’è fruttu di bocca.
Ancu sè u principali sboccu cummirciali di a castagna hè a so trasfurmazioni in farina (AOC/AOP « Farina castagnina corsa »), si pò truvà dinò à l’urighjini di parechji altri prudutti (cunfitturi, castagni cunfitti, licori…). Asisti dinò un’ AOP « Miel de châtaigniers ». In più, mentri l’uparazioni di finizioni di l’AOC salameria, i porchi corsi sò purtati ind’i castagneti pà dà à a carri u so gustu carattaristicu.
I castagni corsi ghjugnini a maturità naturali (quand’eddi falani in tarra) à parta da a mità d’uttrovi sinu à a fini di nuvembri.
L’alivu
A storia spiega in ghjinirali l’urighjini è a diversità di i variità d’alivi. Cusì, a Sabina, a variità a più sparta in Corsica è à puntu in Balagna, hè stata silizziunata in modu lucali, solu à parta d’alivi salvatichi, listessa pà a Capanacce, a variità duminanti di a righjoni di u Capicorsu. Pari chì quissa quì si sia adatta à cundizioni assai duri (venti, è spulvini). Certi variità sò d’urighjini tuscana (« Ghjermana » è « Ghjermana di Balagna »), mentri chì d’altri com’è a Zinzala, sò isciuti d’ibridazioni trà ugliastri lucali è variità impurtati.
Sicondu i variita è i so associ, i muschi duminanti sò sfarenti ancu sè l’AOC/AOP « Huile d’olive de Corse-Oliu di Corsica » ferma carattarizata da a so dulcezza in bocca.
A cugliera di l’alivi si faci, sicondu i variità, da nuvembri à ghjugnu in i sfarenti rughjoni di pruduzzioni. Si poni truvà i primi olii à nantu à u marcatu à parta si da u mesi di dicembri.
