Friscura, savori, culori è dulcezza...

U pumelu, natu d’un’ibridazioni naturali trà un limunoni è un citrò (o aranciu), hè u solu agrumu à ùn essa urighjinariu d’Asia, ma di l’Antilles.

Ind’ì l’arbureti auropei, hè un agrumu ricenti. Hè ghjuntu in Corsica ind’ì l’annati 1990 cù a variità à polpa rossa Star Ruby - A cultura di l’agrumi in Corsica hè assai antica ; dapoi l’Antichità, l’assulanera è a dulcezza inguirninchi di a piaghja urientali ani favurizati i culturi d’agrumi.

U pumelu di Corsica  hè un fruttu senza graneddi, cù una peddi di culori giaddu chì pò prisintà una tacca di culori aranciu è rossu nantu à u fruttu. A so peddi hè liscia è fina. A polpa hè di culori rusulinu à rossu purpureu. Hè assai suchjosu. U so gustu hè parfumatu è inzuccaratu, cù qualchì nota d’acidità, ma senza prisenza d’amarezza.

Coltu à nantu à l’arburu quand’ellu hè maturu è cummircializatu subitu senza trattamentu dopu, hè prisenti nantu à i banchi da marzu à ghjugnu. Ind’ì l’arbureti bè sposti, si pò truvà à parta da farraghju.

I so qualità gustativi è u so modu di pruduzzioni l’ani prucuratu una ricunniscenza à l’Istitutu Naziunali di l’urighjini è di a qualità (INAO). U pumelu di Corsica binifizieghja d'una Indicazioni Giugrafica Prutetta (IGP), chì guarantisci à puntu eccellenza è sapè fà.
 

Altri agrumi cultivati in Corsica : alimea, kumquat, citrò (aranciu), limonu….