L’agricultura corsa

Qualità è Identità

A Corsica pussedi una mansa di prudutti è di sapè fà chì tistimunieghjani di a so storia è di a so situazioni  giufrafica à u cori di u Mediterraniu.

Issi prudutti ani carattaristichi particulari chì poni essa liati à a so cumpusizioni, à u so metudu di pruduzzioni o di trasfurmazioni. Issi spicificità custituiscini un valori aghjustatu è parmettini a so sfarenziazioni.

Sta distinzioni qualitativa è identitaria hè d’altrondi ricunnisciuta è attistata da parechji segni ufficiali di qualità. Ci hè almenu dodici prudutti isciuti da l’agricultura corsa chì sò oghji ghjornu prutetti da un’ Appillazioni d’Origini Cuntrullata è Prutetta (AOC/AOP) : vini, brocciu, oliu d’aliva, meli, farina di castagna, robba purcina. A clementina, edda, si sfarinzieghja cù un Label Rouge e cù un’Indicazioni Giugrafica Prutetta (IGP), com’è i vini di l’isula, i pumeli e i nucigliuli.

A Corsica è i so pruduttori bramani d’andà ancu più luntanu.  Parechji altri dimarchji di ricunniscenza si facini avà : AOC pà i furmagli è a cipolla di Capicorsu, IGP pà l’agneddu, u caprettu, u kiwi è olii d'essenza di murza.

Issi segni ufficiali guarantiscini l’urighjini è a qualità di i prudutti. Parmettini dinò di pruteghja è di tramandà i sapè fà pà mantena issi pruduzzioni è l’attività chì vani cun eddi. Issi labillizazioni parmettini dinò di mantena paisaghji tradiziunali, razzi è variità lucali è à fissà l’attività nantu à i tarritorii di l’appillazioni chì sò in ghjinirali aghji campagnoli sottumessi à a disertificazioni.

Sè i dimarchji in corsu sò cuncritizati, a Corsica avarà tandu unu di i rigistri i più stesi di i prudutti cirtificati in Auropa.
À tempu, parechji splutanti ani sceltu di pruducia in Agricultura biulogica, è quissa ind’ì tutti i filieri di pruduzzioni isulani : agrumi, urtulimu, carri vaccina, vini, meli, farina di castagna, ecc.

Uni pochi di ciffri

  • Splutazioni : 2810
  • Stesa agricula utili (SAU) tutali : 170 000 ettari
  • Unità di travagliu annuali (UTA) : 4 040
  • 3 Interprufissioni righjunali ricunnisciuti da u Ministeru
    • SIDOC : interprufissioni uleicula
    • ILOCC : interprufissioni latti
    • CIVC : interprufissioni Viticula
  • 6 razzi/spezii lucali ricunnisciuti
    • Razza Purcina Nustrale
    • Razza Capruna Corsa
    • Razza Uvina Corsa
    • Razza Bovina Corsa
    • Razza Cavallina Corsa
    • Aba ecutippa Corsa Apis Melifera Melifera
  • 12 Appillazioni d’Urighjini Cuntrullata/Prutetta :
    • 4 AOC vini di Corsica (1975)
    • AOC Muscatu di Capicorsu (1975)
    • AOC/AOP Miels de Corse
    • Mele di Corsica (1998),
    • AOC/AOP Brocciu (1998),
    • AOC/AOP Huile d’olive de Corse – Oliu di Corsica(2004),
    • AOC/AOP Farine de châtaigne de Corse –Farina castagnina corsa (2006)
    • AOC Prisuttu-jambon sec de Corse (2012)
    • AOC Coppa di Corsica-Coppa de Corse (2012)
    • AOC Lonzu-Lonzo de Corse (2012)
  • 4 Indicazioni Giugrafichi Prutetti
    • IGP clementini di Corsica (2007)
    • IGP Vini di l’isula di billezza (2011)
    • IGP Nuciglia di Cervioni (2014)
    • IGP Pumeli di Corsica (2014)
  • Label Rouge Clementini (2014)
  • Agricultura biulogica
    • 282 agricultori
    • 9 500 ettari