Aghjugna à u vostru librettu di strada

Jean-Claude LECA

Farina di castagna AOP – Cunfitturi

Accolta : Vendita tutta l’annata.

I tarritorii : Dui Sevi-Dui Sorru - Cruzini - Cinarca

I catigurii : È dinò…, In ghjiru à l’alivu è u castagnu

I pruduzzioni agriculi : A farin castagnina corsa

U primu aspettu pò sbaglià ! Ùn siiti micca stunati di scuntrà un ghjornu, vicinu à u paesi di Guagnu, stu umoni barbibiancu è cù u sguardu argutu. Ùn siiti micca spavintati parchì a so bravezza è u so carattaru accuglienti sò tali è quali à a so statura !

Jean-Claude Leca hè un parsunaghju di a righjoni, un travagliadori chì ùn stanca mai è chì si batti dipoi sempri pà a ricunniscenza di u porcu corsu è a rializazioni d’una salameria di qualità ind’un ambienti prisirvatu.

Ma nanzu d’addivà i so porchi, hà frustatu assai i so scarpi nantu à i cresti di l’isula. Guidu accumpagnatori di muntagna, hà fattu scopra ogni cantu di a so righjoni à i visitatori. Ancu oghji, s’è vo visiteti a so splutazioni cun ellu, ùn starà tantu à piantà si pà insignà vi u nomi d’un monti, a dirizzioni d’un lavu o u locu duva ci hè una leccia millenaria.

Hè di sicuru issu zinzicu di puesia ch’eddu teni in ellu chì hà fattu di Jean-Claude Leca unu di i punteddi di a canzona corsa di issi ultimi trenta anni. D’istati, a so voci pari francà u so paesi nativu pà ghjugna sin’à noi è sussurà ci i sicreti di a so muntagna !