Aghjugna à u vostru librettu di strada

Pasquin SANTINI

La Promenâne

Spassighjati à sumeru nantu à i stradi di u GR20, stazzi è lavi d’alta muntagna

Accolta : D'aprili à uttrovi nantu à riservazioni / lugliu – aostu da 8 ori à 6 ori di sera.

I tarritorii : Centru di Corsica

I catigurii : Cultura/natura/binistà/passatempi

Chì pò accada ind’ u capu d’un passiunatu di literatura è di storia pà abbandunà u so mistieru di prutesistu di u denti è vultà ind’u so Niolu nativu pà addivà i sumeri ? Di sicuru parechji cosi com’è ind’u capu di st‘animali assai intellighjenti à i quali hà sempri cunsacratu una tinnarezza è un’ammirazioni maiò. « U sumeri pati d’una riputazioni d’animali tistardu senza ciarbellu, orbè si tratta d’un animali cù un’ intillighjenza strasurdinaria, bellu di più cà u cavallu par un dettu ! »  ci cunfidi Pasquin Santini. Mittendulu à dispusizioni di i viaghjatori bramosi di scopra a muntagna corsa cù a so cumpagnia pà una piccula spassighjata à a ghjurnata o pà una simana sana nantu à u GR20, hà vulsutu sopratuttu renda umaghju à st’animali.

« A sapeti, dici Pasquin Santini, i me sumeri ùn si cuntentani di purtà li i so sacchi à tracolli, li amparani a risistenza, a pacenzia è l’umilità. A ghjenti chì viaghja una simana cun elli in i nostri muntagni ni voltani pà a maiò parti trasfurmati è cù un’upinioni sfarenti nantu à elli. » Una cosa hè sicura, cù Pasquin Santini, a « Gente Asine »  hà trovu un difenditori fervidu, passiunatu è passiunanti !